Zëdhënësi i Bashkimit Evropian, Peter Stano, ka deklaruar të martën se Brukseli e ka bërë të qartë se Këshilli Evropian do të diskutojë rreth çështjes së largimit të masave ndëshkuese ndaj Kosovës.
Në një konferencë për media, ai ka deklaruar se shefi i Politikës së Jashtme të BE-së, Josep Borrell, do të raportojë para Ministrave të Jashtëm të shteteve anëtare për raportin lidhur me largimin e masave ndaj Kosovës.
“Mesazhi i Këshillit Evropian në dhjetor për masat ka qenë shumë i qartë, se Këshilli do të diskutojë heqjen e mundshme të masave të BE-së në varësi të zhvillimeve në terren në bazë të raportit të përfaqësuesit të Lartë rreth përmbushjes së kërkesave të BE-së që iu kërkuan Kosovës”, ka thënë Stano.
Ai ka shtuar se mund të konfirmojë se raporti është afër finalizimit, mirëpo nuk ka treguar kohën se kur do t’i dorëzohet Këshillit Evropian.
“Unë mund të konfirmoj pa diskutuar në publik vijueshmërinë e procesit në Këshill, mund të konfirmoj që raporti është afër finalizimit dhe eventualisht të dorëzohet te Këshilli Evropian. Lidhur me përmbajtjen s’mund të komentojë sepse këto janë procedura brenda Këshillit”, ka thënë Stano.