Në konferencën e përbashkët për shtyp, pas takimit me liderët e Shqipërisë, Maqedonisë së Veriut, Kroacisë dhe Malit të Zi, sekretari i përgjithshëm i NATO-s, Jens Stoltenberg, i ka dhënë një mesazh Kosovës dhe Serbisë.
Stoltenberg-u ka thënë se është me rëndësi të fokusohemi në dialog për dallim nga konflikti dhe lufta. Sipas tij, themelimi i Asociacionit mund të jetë një hap i rëndësishëm përpara.
Sekretari i përgjithshëm i NATO-s ka shtuar se është koha që të tejkalohen konfliktet në rajon. “Është koha që të tejkalohen konfliktet në rajon të cilat po zgjasin tepër shumë”, është shprehur Stoltenberg-u.
“Vërejmë se ka rreziqe nga situata në Kosovë dhe negociatat e ngecura në mes të Prishtinës dhe Beogradit. Unë ju drejtohem të gjithëve në rajon, në çdo takim kam theksuar që është me rëndësi të fokusohemi në dialog për dallim nga konflikti dhe lufta. Dialogu është thelbësor për Kosovën dhe Serbinë drejt prosperitetit dhe paqes. Themelimi i Asociacionit mund të jetë një hap i rëndësishëm përpara”, ka thënë Stoltenberg-u.