Administrata e Presidentit Donald Trump hartoi një strategji të re të sigurisë kombëtare që i paraqet aleatët evropianë si të dobët dhe synon të rivendosë dominimin e Amerikës në Hemisferën Perëndimore.
Dokumenti i publikuar të premten nga Shtëpia e Bardhë me siguri do të irritojë aleatët e hershëm të SHBA-së në Evropë për kritikat e tij të ashpra ndaj politikave të tyre të migracionit dhe lirisë së fjalës, duke sugjeruar se ata përballen me “perspektivën e zhdukjes së qytetërimit” dhe duke ngritur dyshime rreth besueshmërisë së tyre afatgjatë si partnerë amerikanë, shkruan AP, transmeton Dukagjini.
Kjo strategji e re përforcon, ndonjëherë në terma të ftohtë dhe luftarakë, filozofinë e Trump “Amerika e Para”, e cila favorizon mosndërhyrjen jashtë shtetit, vë në pikëpyetje dekada marrëdhëniesh strategjike dhe i jep përparësi interesave të SHBA-së mbi të gjitha.
Dokumenti i Strategjisë së re amerikane për sigurinë, në Kapitullin IV kur të titulluar ‘Strategjia’ (Principet) – rikthen edhe një herë në kujtesë ndërmarrjen e Presidentit Trump ‘marrëveshjet historike’ si dhe për ‘negocimin e paqes’ mes disa vendeve, përfshirë Kosovën dhe Serbinë.
“Ai negocioi paqe midis Kamboxhias dhe Tajlandës, Kosovës dhe Serbisë, RDC-së (Republikës Demokratike të Kongos) dhe Ruandës, Pakistanit dhe Indisë, Izraelit dhe Iranit, Egjiptit dhe Etiopisë, Armenisë dhe Azerbajxhanit, dhe e përfundoi luftën në Gaza me të gjithë pengjet e gjalla të kthyer te familjet e tyre” – thuhet në Dokument.
Strategjia e SHBA-së “motivohet mbi të gjitha nga ajo që funksionon për Amerikën – ose, me dy fjalë, ‘Amerika e Para'”, thuhet në dokument.
Kjo është strategjia e parë e sigurisë kombëtare, një dokument që administrata kërkohet me ligj ta publikojë, që nga kthimi i presidentit republikan në detyrë në janar. Është një ndryshim i madh nga kursi i vendosur nga administrata Demokratike e Presidentit Joe Biden, e cila kërkoi të rigjallëronte aleancat pasi shumë prej tyre u tronditën gjatë mandatit të parë të Trump dhe të kontrollonte një Rusi më të vendosur.
Shtetet e Bashkuara po kërkojnë të ndërmjetësojnë përfundimin e luftës gati 4-vjeçare të Rusisë në Ukrainë, një qëllim që strategjia e sigurisë kombëtare thotë se është në interesat jetësore të Amerikës. Por dokumenti e bën të qartë se SHBA-të duan të përmirësojnë marrëdhëniet e tyre me Rusinë pas viteve të trajtimit të Moskës si një i përjashtuar global dhe se përfundimi i luftës është një interes thelbësor i SHBA-së për të “rivendosur stabilitetin strategjik me Rusinë”.
Dokumenti është gjithashtu kritik ndaj aleatëve evropianë të Amerikës. Ata e kanë gjetur veten ndonjëherë në kundërshtim këtë vit me qasjet në ndryshim të Trump ndaj luftës Rusi-Ukrainë dhe po përballen me sfida ekonomike të brendshme, si dhe me një krizë ekzistenciale, sipas SHBA-së.
SHBA-të sugjerojnë se Evropa po dobësohet nga politikat e saj të imigracionit, rënia e lindjeve, “censura e lirisë së fjalës dhe shtypja e opozitës politike” dhe një “humbje e identiteteve kombëtare dhe vetëbesimit”.
“Nëse trendet aktuale vazhdojnë, kontinenti do të jetë i panjohshëm në 20 vjet ose më pak. Si i tillë, nuk është aspak e qartë nëse disa vende evropiane do të kenë ekonomi dhe ushtri mjaftueshëm të forta për të mbetur aleatë të besueshëm. Shumë nga këto kombe aktualisht po dyfishojnë përpjekjet në rrugën e tyre të tanishme. Ne duam që Evropa të mbetet evropiane, të rifitojë vetëbesimin e saj qytetërues”, thuhet në dokument.
Pavarësisht maksimës së Trump “Amerika e Para”, administrata e tij ka kryer një seri sulmesh ushtarake ndaj trafikantëve të dyshuar të drogës në Detin e Karaibeve dhe Oqeanin Paqësor lindor, ndërsa po peshon veprime të mundshme ushtarake në Venezuelë për të ushtruar presion ndaj Presidentit Nicolás Maduro.
Lëvizjet janë pjesë e asaj që strategjia e sigurisë kombëtare e përcakton si “një ‘Pasojë e Trump’ e Doktrinës Monroe”. Doktrina Monroe e vitit 1823, e formuluar nga Presidenti James Monroe, fillimisht kishte për qëllim kundërshtimin e çdo ndërhyrjeje evropiane në Hemisferën Perëndimore dhe u përdor për të justifikuar ndërhyrjet ushtarake amerikane në Amerikën Latine.