Profesori i Universitetit të Prishtinës, Faton Ismajli, i ftuar në emisionin “Rreth e Rrotull” në TV Dukagjini, ka thënë se profesioni i gazetarisë në Kosovë nuk është i lehtë për t’u ushtruar, madje edhe gazetarët e dinë këtë fakt ditën kur fillojnë të dalin në teren.
“Është krijuar një ambient jo i mirë i të bërit gazetari nga pushteti që nga paslufta, e sidomos kjo e fundit, ka ndërmarrë fushata të rralla për gazetarët”, ka thënë Ismajli.
Sa i përket komenteve të qytetarëve gjatë rastit të fundit, sipas Ismajlit janë shqetësuese, madje gazetarët i quajnë si gazetarë të Serbisë dhe të Rusisë.
“Rasti i fundit i sulmit ndaj dy gazetareve e shoh në këtë frymë, që është ndërtuar narrativa se gazetarët nuk janë të mirë, krime ndodhin, raste ndodhin, mirëpo nëse e shohim se si sillej sulmuesja ndaj gazetareve ishte e çuditshme, dhe njerëzit e tillë kanë nevojë për edukim”, ka thënë Ismajli.
Ndërsa, Burim Zariqi ka thënë se statistikat e AGK-së dhe të Policisë së Kosovës tregojnë se ka një rritje të sulmeve ndaj gazetarëve, përfaqësuesve të mediave të Kosovës në përgjithësi.
“Gazetarët nuk e kanë sigurinë që ta kryejnë detyrën e tyre, madje përfaqësuesit politikë janë ata që e kanë një gjuhë jo fort të mirë, për të mos e quajtur degraduese ndaj mediave”, ka thënë Zariqi.
Zariqi ka njoftuar se janë 74 raste që AGK-ja ka përmbledhur vetëm në përfundim të vitit 2023, 7 raste në fillim të këtij viti, duke mos përfshirë edhe dy rastet e fundit.
E sa i përket reagimeve nga krerët e shtetit, profesori Ismajli ka thënë se presidentja ka mundur të shpreh të paktën keqardhje, jo të ndërhyjë në sistemin e drejtësisë. Sipas Ismajlit, pushteti nuk ka qenë shumë miqësor me mediat dhe si presidentja, si kryeministri i kanë lënë shije të keqe.
Gjithashtu, edhe gazetari Shkodran Hoti është shprehur se sjellja e djeshme është manifestim i një qasje të rrezikshme e cila është ndërtuar nga pushtetet, sidomos nga ky i fundit.
Sa i përket reagimeve nga krerët e vendit, Hoti e pëmendi burrin e presidentes dhe disa raste të tjera të ngjashme.
“Duhet të sjellim në vëmendje që bashkëshorti i presidentes është ai, i cili e ka përdorur një gjuhë të ngjashme me komentuesit e rrjeteve sociale që janë militantë dhe njerëz që njihen për linçim dhe gjuhë problematike”, shtoi më tej Hoti.
Tutje, Hoti shtoi se qasja e partive politike është shqetësuese, ndërsa sa i përket individëve që flasin në rrjete sociale, ata janë hallka e fundit në këtë problem edhe pse secili prej tyre do të duhej ta ballafaqonin me drejtësi.