Emisari i Bashkimit Evropian për dialogun Kosovë – Serbi, Miroslav Lajçak, pas takimit me kryeministrin Albin Kurti, ka thënë se çështjen e sulmit në Banjskë e ka ngritur edhe në Beograd, e për të cilën thotë se flitet në çdo takim.
Para mediave, Lajçak theksoi se shtetet anëtare të Bashkimit Evropian presin pasojat dhe bën thirrje që personat përgjegjës të sillen para drejtësisë.
Po ashtu, për hetimet e sulmit në Banjskë, Lajçaku thotë se ato po kryhen nga shtete individuale dhe jo nga BE-ja.
“Sulmi në Banjskë diskutohet çdo herë në çdo takim, e kam ngritur edhe në Beograd sepse natyrisht publiku evropian dhe shtetet anëtare të BE-së presin pasojat dhe personat përgjegjës të sillen para drejtësisë dhe kur flasim për hetimet nuk jam adresa e duhur sepse nuk ka hetime që udhëhiqen nga BE-ja, por vendet po i bëjnë hetimet e veta. Ne vetëm po pranojmë informata nga partnerët”, tha Lajçak.
Nga sulmi në Banjskë, i cili ndodhi më 24 shtator, mbeti i vrarë rreshteri policor, Afrim Bunjaku.