Në kuadër të Konferencës së Sigurisë në Mynih, Kryeministri i Republikës së Kosovës, Albin Kurti, zhvilloi një takim me senatorët amerikanë Jeanne Shaheen, Chris Murphy, Thom Tillis dhe Ruben Gallego.
Në këtë takim, kryeministri shoqërohej nga Zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, si dhe nga Ministri i Mbrojtjes, Ejup Maqedonci.
Kurti shprehu mirënjohje për Shtetet e Bashkuara të Amerikës, duke i cilësuar si aleatin kryesor të Kosovës, ndërsa nënvizoi arritjet e vendit në forcimin e demokracisë dhe zhvillimin ekonomik.
Gjatë bisedës u trajtua edhe orientimi euro-atlantik i Kosovës, përfshirë përkushtimin për anëtarësim në NATO dhe në Bashkimin Evropian.
Sa i përket dialogut me Serbinë, kryeministri theksoi domosdoshmërinë e dorëzimit të Milan Radoičić për t’u përballur me drejtësinë në Kosovë lidhur me sulmin e 24 shtatorit 2023 në Banjskë. Ai gjithashtu përmendi nevojën për nënshkrimin e Marrëveshjes Bazike dhe për tërheqjen e letrës së ish-kryeministres serbe Ana Brnabić, në të cilën vihet në pikëpyetje respektimi i integritetit territorial të Kosovës.