Kryeministri i Mbretërisë së Bashkuar, Rishi Sunak, ka thënë se e ashtuquajtura “epokë e artë” e marrëdhënieve me Kinën ka përfunduar, pasi ai u zotua të “evoluojë” qëndrimin e Mbretërisë së Bashkuar ndaj vendit.
Në fjalimin e tij të parë për politikën e jashtme, kryeministri ka thënë se marrëdhëniet e ngushta ekonomike me Kinën, në dekadën e fundit, përbëjnë naivitet, shkruan BBC.
Ai ka thënë se është koha që Mbretëria e Bashkuar të zëvendësojë shpresën me “pragmatizëm” për t’iu qasur konkurrencës.
Por, ai u paralajmërua kundër “retorikës së Luftës së Ftohtë”, duke shtuar se ndikimi global kinez nuk mund të injorohet.
Sunak është përballur me presion nga mbështetësit konservatorë për të ashpërsuar qëndrimin e Mbretërisë së Bashkuar ndaj Kinës qëkur ai mori detyrën si udhëheqës i konservatorëve dhe kryeministër i Mbretërisë së Bashkuar muajin e kaluar.
Fjalimi, në Banketin e Lordit të Bashkisë në Londër, vjen pas protestave në Kinë gjatë fundjavës, për menaxhim të pandemisë së COVID-19.
Policia ka bërë disa arrestime, dhe një gazetar i BBC-së u arrestua teksa mbulonte një protestë në Shangai të dielën.
Ai u rrah nga policia gjatë arrestimit dhe u mbajt për disa orë para se të lirohej.
Sunak i tha audiencës dhe ekspertëve të politikës së jashtme se përballë protestave, Kina kishte “zgjedhur të godiste më tej, duke përfshirë edhe sulmin ndaj një gazetari të BBC”.
“Ne e pranojmë se Kina paraqet një sfidë sistematike për vlerat dhe interesat tona, një sfidë që bëhet më e mprehtë ndërsa lëviz drejt autoritarizmit edhe më të madh,” tha ai.
Ai shtoi se “epoka e artë” e marrëdhënieve MB-Kinë kishte “mbaruar”, së bashku me “idenë naive” se më shumë tregti me Perëndimin do të çonte në reformën politike kineze.