Ministri i Punëve të Brendshme, Xhelal Sveçla, ka reaguar në lidhje me 24-vjetorin e Masakrës së Reçakut.
“Masakra e Reçakut që ndodhi nga forcat ushtarako-policore të regjimit gjenocidal të Millosheviqit, në mëngjesin e 15 janarit të vitit 1999, mbetet ndër aktet më të rënda kriminale ndaj popullit tonë dhe këmbana që zgjoi ndërgjegjen e gjithë botës”, ka shkruar Sveçla.
Ministri Sveçla ka shtuar se këtë të diel, kanë kujtuar dhe nderuar “45 civilët shqiptarë të pafajshëm e të pambrojtur që u masakruan mizorisht pa dallim gjinie e moshe”.
“Ishim të nderuar që edhe këtë vit, si para 24 vitesh, në Reçak ishte edhe miku i gjithë popullit shqiptar, miku im, ambasadori William Walker. Në historinë tonë të lirisë, ambasadori Walker do të mbetet figura emblematike dhe e së vërtetës së Reçakut”, ka shtuar Sveçla.
Tutje, Sveçla ka theksuar se masakra është “propaganduar nga Serbia se nuk ka ndodhur, dhe kjo pikërisht për të amnistuar e rehabilituar kriminelët që kryen këtë krim”.
“Asnjë kriminel nuk është dënuar deri më tash për këtë krim kundër njerëzimit, por kjo masakër nuk do të hiqet asnjëherë nga historia jonë. Masakra e Reçakut është e vërteta e regjimit të Millosheviqit në Kosovë dhe ky është një fakt i pandryshueshëm”, ka potencuar tutje Sveçla.
Ai ka deklaruar se “drejtësia ndonëse është vonuar, duhet dhe do të ndodhë sa më parë, për secilën jetë të marrë mizorisht e për secilin trup që akoma nuk prehet i qetë në tokën tonë”.