Ministri i Brendshëm, Xhelal Sveçla, ka thënë se rreth 400 ekstremistë serbë po trajnohen përreth kufirit me Kosovën, teksa shton se nevojitet vetëm një urdhër i presidentit serb, Aleksandër Vuçiq, që ata të nisin sulme agresive.
“Rreth 400 ekstremistë serbë po trajnohen në zonat përreth kufirit me Kosovën dhe me një urdhër të Vuçiq mund të aktivizohen në sulme agresive”, ka thënë Sveçla për “News24”.
Sveçla ka thënë se presidenti i Serbisë, Aleksandër Vuçiq, dhe qeveria e tij, e kanë përdorur territorin e Kosovës për të shkaktuar tensione në rajon dhe më gjerë.
Ministri tregon se situata në veri është e qetë, por e brishtë për shkak të tensionimeve të kohpaskohshme.
“Situata në veri është e qetë, por e brishtë për shkak të tensionimeve të kohëpaskohshme, por edhe për shkak të një qasje destruktive të Beogradit karshi Kosovës, karshi kësaj zone, por edhe vetë qytetarëve tanë me kombësi serbe”, tha Sveçla.
“Beogradi, më konkretisiht, Vuçiq dhe qeveria e tij, kanë përdorur serbët e Kosovës, kanë përdorur këtë territor që të shkaktojnë tensione jo vetëm për Kosovën, por edhe në rajon dhe më gjerë, duke dashur ta shantazhojnë së pari Kosovën dhe bashkësinë ndërkombëtare”, shtoi më tej ai.
Teksa foli për vendimin për targat dhe dinarin, Sveçla tha se të njëjtat janë vendime normale të një vendi që aspiron të jetë pjesë e Bashkimi Evropian dhe pjesë e NATO-s.
“Ne jemi shtet i pavarur dhe sovran dhe duhet të jemi po ashtu edhe një shtet normal, i pavarur dhe sovran. Nuk aspirojmë asgjë më shumë sesa të jemi një vend demokratik, ku rendi dhe ligji sundon. Dhe qoftë vendimi për dinarin, qoftë vendimet e mëhershme për targat, për energjinë elektrike, janë vendime më se normale të një vendi që aspiron të jetë pjesë e BE-së dhe NATO-s”, tha ai.