Ministri i Brendshëm, Xhelal Sveçla, ka thënë se Ura e Ibrit pritet të hapet së shpejti. Ky hap, sipas tij, po përgatitet pas koordinimit me KFOR-in dhe bisedimeve në Bruksel.
Sveçla ishte në Berlin të martën, ku mori pjesë në mbledhjen e ministrave të Brendshëm të Ballkanit Perëndimor, në kuadër të Procesit të Berlinit.
“Realisht këto veprime po kritikohen nga Serbia, kurse ka brengosje nga ndërkombëtarët lidhur me shpejtësinë e ndërmarrjes se ndryshimeve substancialisht të nevojshme në sundim të rendit dhe ligjit. Ne nuk mund të presim një Serbi e Vuçiq dhe Daçiqit të pajtohet që rendi dhe ligji të sundojë kudo… Ura e Ibrit do të hapet shumë shpejt. Unë jam i bindur se pas bisedimeve dhe koordinimit të nevojshëm me KFOR-in që është prezent aty, por edhe bisedave në Bruksel shumë shpejt do të kemi një situatë tjetër”, ka thënë Sveçla për Deutsche Welle në gjuhën shqipe.