Ministri i Punëve të Brendshme i Republikës së Kosovës, Xhela Sveçla, ka dhënë detaje për sulmimin në Zubin Potok dhe Mitrovicë të Veriut, ku ka thënë se “Policia e Kosovës pasi ka pranuar kërkesën e Komisionit Qendror të Zgjedhjeve, sot ka asistuar për funksionalizimin e zyrave të Komisioneve Komunale Zgjedhore në Zubin Potok dhe Mitrovicë të Veriut”.
“Nga grupe të organizuara me disa individë prej tyre të maskuar, Zyrtarët Komunal të Zgjedhjeve dhe zyrtarët policor janë sulmuar me shok bomba dhe të shtëna në ajër, për të ndaluar ushtrimin e detyrës së tyre zyrtare”, ka deklaruara Sveçla për RTV Dukagjinin.
Më tej, i pari i Ministri së Punëve te Brendshme ka treguar qëllimin e këtyre sulmeve që sipas tij, kanë për synim pengimin e vazhdimit të procesit të përgatitjes për zgjedhjet e jashtëzakonshme që pritet të mbahen më 18 dhjetor të këtij viti.
“Sulme të tilla si ky sot me qëllim të bllokimit të procesit zgjedhor janë të papranueshme. Organizimi i zgjedhjeve është obligim kushtetues ndërsa pjesëmarrja në to është e drejtë e qytetarëve që nuk mund të cenohet nga askush”, ka shtuar ai .
Policia e Kosovës ka nisur punën e saj për t’i identifikuar të gjithë kriminelët e përfshirë në këtë ngjarje për t’i ballafaquar me drejtësinë ka thënë Sveçla.
“Policia do të vazhdojë angazhimet sipas mandatit të saj në gjithë Republikën e Kosovës për ofrimin e sigurisë, garantimin e rendit dhe sundimin e ligjit”, ka përfunduar ai.