Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, pas vendimit të Ministrisë së Arsimit për tekstet shkollore, ka kritikuar qeverinë duke thënë se ka shkaktuar një fillim kaotik të vitit shkollor.
Ai ka thënë se pas këtij vendimi, janë gjeneruar edhe “dhjetë probleme të tjera”.
“Një fillim kaotik i vitit të ri shkollor. Demotivim total i mësimdhënësve, prindërve e fëmijëve. Kjo qeveri i qaset një problemi a sfide duke i gjeneruar dhjetë të tjera. E pakoordinuar nga brenda, e çakorduar me të tjerë, as nuk administron, as nuk menaxhon, as nuk qeveris, krejt çfarë bën është një vendimmarrje, rezultatet e së cilës nuk është në gjendje t’i projektojë e as t’i njohë”, ka shkruar Tahiri në Facebook.
Sipas tij, është dobësuar organizimi shtetëror dhe çdo hallkë institucionale ka rënë.
“Gjithçka është formë e shumë pak përmbajtje. Njerëzit në radhë për të ikur nga vendi, jo fort për vete, sepse as shpresë tashmë nuk kanë, por për t’i dhënë mundësi fëmijëve të tyre të ëndërrojnë e shpresojnë”, ka vijuar ai.
Ndryshe, Ministria e Arsimit ka marrë vendim që të subvencionojë blerjen e librave shkollore me 80 euro për nxënësit nga klasa 1 deri në klasën e 5.
Kurse për nxënësit nga klasa 6 deri në klasën e 9, të cilët tashmë i kanë të siguruara tekstet mësimore, do të ndahen 30 euro si mbështetje për materiale të tjera shkollore.
Pas këtij vendimi është publikuar linku në platformën E-Kosova, link ky në të cilin prindërit mund të aplikojnë për subvencionim të teksteve shkollore për fëmijët.