Me vendosje të bombës në shtëpi, ishte këcënuar viktima e fajdeve, nga të arrestuarit në Pejë. Shuma që ata kërkonin nga i dëmtuari ishte 240 mijë euro, ndonëse sipas prokurorisë investimi i bërë ishte 120 mijë euro.
Në kërkesën për caktimin e masës së paraburgimit, të cilën e ka siguruar Dukagjini, thuhet se viktima kishte qenë vazhdimisht i kërcënuar nga të dyshuarit, çka edhe kishte tentuar ta vriste vetën.
Të gjitha këto ishin zbuluar gjatë hetimeve, ku janë përdorur masat e fshehta, sikurse përgjimet.
“Takimi i dates 20.06.2024 në mes të viktimave me të pandehurin A.P dhe I.H ku ndër të tjera i pandehuri e pranon se investimi i tyre është 120.000, mirëpo nga të dëmtuarit kërkon që t’ia paguaj 240.000 në të kundërtën do të ju gjuaj bombe në shtëpi dhe i kërcënon në mënyra të ndryshme,” thuhet tek Kërkesa e Prokurorisë në Pejë.
Tutje aty sqarohet se grupi i dyshuar, kishin përcjellur njërin prej viktimave, e më pas edhe e kanë rrëmbyer. Njëri nga të dyshuarit e ka pranuar se për të kryer këtë vepër ata angazhuan një person tjeter, i cili ende nuk është identifikuar nga drejtësia.
“Të pandehurit veprën penale e kanë kryer në vazhdimësi, ku në mënyrë permanente i kanë shkuar edhe tek shtepia e të dëmtuarve, e kanë kërcënuar, e kanë rrëmbyer, e kanë përcjellë me ditë të tëra tek shtëpia e tyre, e kanë kërcënuar se do t’ia hedhin granatën dhe fakte tjera,” thuhet nga Prokuroria.
Në arsyetimet e prokurorisë, ndër të tjera përmendet edhe pasuria që të pandehurit mund të ketë në Dubai.
“Do të verifikohet pasuria e të pandehurve, me theks të vecantë ajo jashtë shtetit e sidomos në Dubai ku të pandehurit pretendojnë se kanë miliona atje….Po ashtu për të pandehurin I.H do të identifikohet kush është daja i tij i cili punon në spital dhe i ka dërguar informata për gjendjen e të dëmtuarit dhe në këtë mënyrë do të analizohet edhe vepra penale e keqpërdorimit të detyrës apo autoritetetit zyrtar.”
4 të arrestuarit në Pejë, tashmë ndodhën nën masën e paraburgimit për një muaj nën dyshimet për veprat penale “Fajde”, “Detyrim” e “Rrëmbim”.
Për veprat penale “Fajdeja” dhe “Detyrimi”, nën masën e paraburgimit janë edhe dy të arrestuarit në Gjilan. M.Sh dhe E.Sh që kanë edhe lidhje familjare dyshohen se i kanë shkaktuar dëme materiale viktimës në vlerë mbi 600 mijë euro, duke e detyruar atë që ta mbyllë dhe ta shesë kompaninë e tij.