Të enjten e nëntë qershorit në orën 12:00 në sheshin “Skenderbeu” në Prishtinë mbahet Parada e Krenarisë.
Në njoftimin për media, thuhet se parada do të përmbyllet me një koncert në pllaton e Pallatit të Rinisë dhe Sporteve, në Prishtinë.
Ndryshe, grupi organizativ “Prishtina Pride” po organizon Javën e Krenarisë 2022 nga datat gjashtë deri më nëntë qershor.
Në njoftim thuhet se në edicionin e saj të gjashtë, Java e Krenarisë, nëpërmjet sloganit “Edhe n’shtet edhe n’familje”, pasqyron praninë dhe ekzistencën e mohuar të personave LGBTQI+ si në shtet, ashtu edhe në familje.
“Në një vend ku shoqëria dhe familja në thelb janë heteronormative dhe patriarkale, është detyrë e shtetit që të krijojë siguri për personat të cilët nuk ndihen të sigurt nga mendësia shtypëse e cila prodhohet nga këto dy institucione. Partitë politike, qeveria dhe presidenca në anën tjetër nuk i kanë prioritet të drejtat LGBTIQ+, përkundrazi, këta persona përdoren nga ta për të arritur në pushtet. Në njërën anë tregohen progresiv në tryeza të mbyllura me ndërkombëtarë e shoqëri civile, në anën tjetër tentojnë t’i largohen sa më shumë temave të orientimit seksual dhe identitetit gjinor në fushata e komunikim me votuesit”, thuhet në njoftim.
Sipas njoftimit, këtë vit Parada e Krenarisë, përveç festimit, duhet të konsiderohet si rezistencë paqësore për të adresuar çështje të situatës aktuale të personave LGBTQI+.
Të hënën e gjashtë qershorit, në objektin e qeverisë së Republikës së Kosovës është hapur zyrtarisht Java e Krenarisë në Prishtinë nën slloganin “Edhe n’shtet edhe n’familje”.
Në hapjen zyrtare, përveç organizatave, të pranishëm ishin edhe Presidentja e Kosovës, Vjosa Osmani, Ministrja e Drejtësisë, Albulena Haxhiu, Habit Hajredini nga Zyra për Qeverisje të Mirë, Ambasadori i Shteteve të Bashkuara të Amerikës, Jeffrey M. Hovenier; Shefi i Zyrës të Bashkimit Evropian në Kosovë, Tomas Sunjog, të cilët u drejtuan të pranishmëve dhe mediave me nga një fjalë rasti.
Fillimisht ishte Presidentja e Kosovës e cila kërkoi bashkëpunim në mes institucioneve dhe shoqërisë civile për avancimin e të drejtave të personave LGBTIQ+ dhe të drejtave të njeriut në përgjithësi.
Pas Presidentes, ishte Ministrja e Drejtësisë, Albulena Haxhiu e cila premtoi se do të angazhohet për të drejtat e njeriut pavarësisht orientimit seksual, ndonëse nuk u përmend identiteti gjinor.