Presidenti i Turqisë, Recep Tayyip Erdogan, ka thënë se disa hotele në Antalia, do të strehojnë të mbijetuarit nga tërmeti.
Ekipet e shpëtimit kanë vazhduar punimet edhe të martën për të gjetur të mbijetuar në rrënojat e mijëra ndërtesave të rrëzuara nga një tërmet me magnitudë 7.8 dhe pasgoditje të shumta që goditën Turqinë lindore dhe Sirinë fqinje, me zbulimin e më shumë trupave duke e çuar numrin e të vdekurve në më shumë se 5 mijë.
“Duke filluar nga vendet afër zonës së fatkeqësisë, po bëhen planet e nevojshme për t’i vënë në shërbim hotelet që tashmë kanë pezulluar aktivitetet e tyre për shkak të sezonit të dimrit”, ka thënë Erdogan në një fjalim.
“Vetëm në rajonin e Antalias janë përgatitur 50 mijë shtretër për këtë qëllim”, ka thënë ai, teksa shtoi se “rreth tetë mijë njerëz u shpëtuan nga rrënojat deri më tani”, shkruan CNN.
Të plagosurit që u trajtuan pasi u shpëtuan, u dërguan në spitalet e zonave të tjera të vendit, veçanërisht në Mersin, Stamboll dhe Ankara.
Deri më tani, 54 mijë tenda dhe 102 mijë shtretër janë dërguar në rajone, dhe 53 mijë e 317 personel shpëtimi po punojnë në zonën e tërmetit.
Terminalet e transmetimit satelitor janë dërguar në rajon me qëllim që të mos ketë ndërprerje në komunikim.
Vendet nga e gjithë bota kanë dërguar ekipe për të ndihmuar në përpjekjet e shpëtimit dhe agjencia e menaxhimit të fatkeqësive të Turqisë ka thënë se më shumë se 24 mijë e 400 personel emergjence janë tani në terren.
Por me një zonë kaq të gjerë territori të goditur nga tërmeti i së hënës dhe gati 6 mijë ndërtesa të konfirmuara se janë shembur vetëm në Turqi, përpjekjet e tyre u shpërndanë paksa.
Përpjekjet për të arritur të mbijetuarit janë penguar dhe nga temperaturat nën zero dhe afër 200 lëkundjet e pasme, të cilat e bënë të rrezikshëm kërkimin nëpër struktura të paqëndrueshme.