Një person ka mbetur i plagosur si pasojë e të shtënave me armë zjarri në rrugën “Bedri Shala” në Prishtinë.
Siç ka bërë të ditur zëdhënësja e policisë për rajonin e Prishtinës, Flora Ahmeti, rasti ka ndodhur rreth orës 10:00 të mëngjesit, dhe policia ka dalë në vendin e ngjarjes.
“Rreth orës 10:00, policia ka marrë informatën për të shtëna me armë në rrugën “Bedri Shala” në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para raportohet për një person të lënduar, i cili dyshohet të ketë marrë lëndime nga arma e zjarrit”, ka thënë Ahmeti për Dukagjinin.
Hetuesit policorë në koordinim me prokurorinë, po ndërmarrin veprimet hetimore për zbardhjen e plotë të rastit.