Dy burra dhe një grua janë arrestuar në Gjilan nën dyshimin se të tre kanë trajtuar në mënyrë jo të ligjshme një të moshuar nën pretendimin e hapjes së një shtëpie për të moshuar, duke përfituar kështu në mënyrë personale.
Raporti 24-orësh i Policisë së Kosovës bën të ditur se familjarët e së moshuarës kanë paguar një mijë euro çdo muaj.
“TRAJTIM I PANDËRGJEGJSHËM MJEKËSORË- MASHTRIM/ Gjilan 10.02.2023 17:20 Më 03.03.2023 janë arrestuar 3 të dyshuar (dy meshkuj dhe një femër) kosovarë pasi dyshohet se të njëjtit kanë mbikëqyrur dhe trajtuar në mënyrë jo të ligjshme viktimën femër kosovare – e moshuar. Të dyshuarit kinse kanë hapur një “Shtëpi për të moshuar”, ku për qëllim të përfitimi personal, në këtë rast për sistemimin e të moshuarës, familjarët e saj kanë paguar 1000 € për muaj”, thuhet në njoftim.
Krahas kësaj, bëhet e ditur se njëri nga dy burrat e dyshuar është dërguar në mbajtje, gjersa tjetri dhe gruaja e dyshuar janë liruar në procedurë të rregullt.