Gati gjashtë vite në paraburgim e tre vite në proces gjyqësor.
Me katërshën e Ushtrisë Çlirimtare të Kosovës që po gjykohen në Hagë nga Dhomat e Specializuara, të shtunën u solidarizuan artistë kosovarë.
Këta të fundit organizuan ekspozitën “Artistët në hap me luftëtarët”, pikërisht në ditën kur po shënohet tre vjetori i nisjes së gjykimit në rastin kundër ish-krerëve të UÇK-së.
Veton Gusia, kryetari i Shoqatës “Artistët për Artistët” foli më shumë për këtë organizim.
“Në këtë rast jemi mbledhë me shpreh një pakënaqësi lidhur me gjykimin e ushtarëve tonë dhe në të njëjtën kohë pa na duket po i gjykojnë edhe viktimat e luftës, edhe refugjatët edhe krejt vuajtjet tona, kështu që ne jemi mbledhë si artistë me tema të ndryshme të lira për me shpreh pakënaqësinë tonë në lidhje me gjykimin e ushtarëve tonë në Hagë”, ka thënë Gusia.
Revoltën për gjykimin në Hagë e shprehu edhe Musë Prelvukaj.
“Është një ekspozitë tematikë, është ekspozitë e revoltës sepse sot është përvjetori i gjykimit të padrejtë të kreut të Ushtrisë Çlirimtare të Kosovës. Me këtë dua të them se po gjykohen edhe të rënët edhe të plagosurit edhe heronjtë e gjallë, njerëzit aktiv në politikën shqiptare që ishin pjesëmarrës në luftën clirimtare të Kosovës”, ka thënë Prelvukaj.
Falenderues ndaj artistëve qe Ismail Tasholli nga platforma “Liria ka Emër”.
“Desha vetëm dy fjalë falenderimi sepse artistët kanë qenë pararoja e ruajtjes së vlerave tona edhe kjo ekspozitë simbolike është po i njejti mesazh që qytetaria merr peshën në mesin e artistëve”, ka thënë Tasholli.
Gjykimi për krime lufte ndaj Hashim Thaçit, Kadri Veselit, Jakup Krasniqit dhe Rexhep Selimit ka përfunduar në fund të shkurtit, derisa palët janë pritje të vendimit nga trupi gjykues.