Presidenti amerikan, Donald Trump ka deklaruar se Irani është duke negociuar me SHBA-në, pavarësisht mohimeve nga Teherani.
Duke folur në një aktivitet në SHBA, Trump tha se liderët iranianë “duan shumë të arrijnë një marrëveshje”, por kanë frikë ta pranojnë publikisht.
“Ata po negociojnë, por kanë frikë të thonë, sepse mendojnë se mund të vriten nga njerëzit e tyre, kanë frikë se vriten edhe nga ne,” u shpreh ai.
Nga ana tjetër, ministri i Jashtëm i Iranit, Abbas Araghchi, ka theksuar se vendi do të vazhdojë të “mbrohet” dhe se “nuk ka asnjë qëllim për të negociuar për tani”.
Ai shtoi se mesazhet e përcjella përmes vendeve ndërmjetëse nuk përbëjnë dialog apo negociata.
Më herët, një zyrtar iranian bëri të ditur se Teherani ka paraqitur pesë kushte për përfundimin e luftës, përfshirë ndalimin e plotë të konfliktit në të gjitha frontet dhe pagesën e dëmshpërblimeve.