Një muaj paraburgim u është caktuar tre të dyshuarve në rastin e “Bon Vivant”.
Lajmin për Dukagjinin e ka konfirmuar zëdhënësja e Gjykatës Themelore të Prishtinës, Mirlinda Gashi.
Të premten, si pasojë e një incidenti në kafiterinë ‘Bon Vivant” në Prishtinë një person ka humbur jetën dhe 17 të tjerë janë plagosur.
Viktima ishte 39-vjeçar.
Ndryshe, njëri nga të dyshuarit për përfshirje në incidentin në kafiterinë e Prishtinës “Bon Vivant” mbrëmjen e së premtes mësohet të jetë i kërkuar edhe nga FBI-ja.
I njohur me pseudonimin “Duka”, Dukagjin Nikollaj kërkohet edhe nga FBI-ja për trafikim narkotikësh.
Bazuar në fletëkërkimin e FBI-së, bëhet e ditur se 40-vjeçari ishte i përfshirë në trafikim të marihuanës në periudhën e viteve 2003-2007.
I dyshuari për përfshirje në incidentin e “Bon Vivantit”, i kërkuar edhe nga FBI-ja
Lidhur me rastin, Ministri i Punëve të Brendshme, Xhelal Sveçla, ka deklaruar se palët e konfliktit në kafiterinë “Bon Vivant” kishin dhjetra vepra penale e, megjithatë, të njëjtit ishin në liri. Ai vlerëson se drejtësia ka dështuar.
“Edhe sot humbëm një jetë nga dora e kriminelëve të cilët, për arsye të dështimeve të drejtësisë, kanë qenë të lirë. Në qendër të kryeqytetit, shtetasit tanë janë të rrezikuar për shkak të kriminelëve që nuk po ndëshkohen nga drejtësia. Ata duke u ndjerë të plotfuqishëm përballë ligjit nuk hezitojnë që hesapet e tyre kriminale t’i zgjidhin me armë e atë në lokale publike në prezencë dhe duke rrezikuar dhjetra të rinj të tjerë. Palët e përfshira në konflikt kanë me dhjetra vepra të mëhershme penale. Kur lëngon drejtësia, situatat e ngjashme janë të pashmangshme!, ka shkruar Sveçla.
Ai ka deklaruar se Policia e Kosovës duhet të rrisë kapacitetet e saj, gjersa anash nuk ka lënë as Prokurorinë e gjykatësit.
Ky incident nisi edhe takimet lidhur me krijimin e Policisë së Kryeqytetit për çka kishte njoftuar edhe Kryetari, Përparim Rama.