Drejtoria e inteligjencës ushtarake të Ukrainës (HUR) ka bërë publike një video të një operacioni të ri special të realizuar me sukses nga njësitë e saj në Krime.
Sipas njoftimit, luftëtarët e grupit special “Prymary” kryen sulme të sakta ndaj objektivave strategjikë rusë – një baze ajrore në Hvardiiske dhe një anije ushtarake në Gjirin e Sevastopolit, raporton Telegrafi.
Inteligjenca ukrainase bëri të ditur se dronët goditën një bazë ajrore ushtarake pranë Simferopolit, ku ishin stacionuar helikopterë luftarakë. Nga sulmi u shkatërruan të paktën dy helikopterë Mi-8, me një kosto të vlerësuar prej 20 deri në 30 milionë dollarësh.
Një tjetër goditje e rëndësishme ishte shënjestrimi i një rimorkiatori ushtarak rus, me gjasë BUK-2190, i pozicionuar në Gjirin e Sevastopolit.
Njësia “Prymary” konsiderohet elitë, pasi përfshin specialistë të zbulimit nënujor, të cilët trajnohen për vite me radhë me investime që arrijnë miliona dollarë dhe pajisen me teknologjinë më të avancuar.