Komuna e Malishevës ka vazhduar me iniciativën për dezinsektimin kundër rriqrave.
Përmes një njoftimi për media në faqen e tyre zyrtare në Facebook kanë bërë të ditur se dezinsektimi është duke u bërë në zonat që konsiderohen endemike dhe në ato zona ku janë shënuar më shumë raste të thumbimeve nga rriqrat.
Po ashtu, në komunikatën e tyre thuhet se menaxhimi i situatës është duke u bërë sipas planifikimit dhe se nuk kanë hasur në ndonjë pengesë që do ta ndalonte dezinesktimin e zonave të rrezikshme.
“Sipas shtabit komunal për menaxhimin e situatës me EHKK në Komunën e Malishevës, realizimi i fushatës së dezinsektimit, është duke vazhduar sipas planifikimit dhe deri më tani nuk janë shënuar pengesa në realizimin e dezinsektimit, si dhe kjo është pritur mirë nga ana e qytetarëve në vendbanimet ku është realizuar dezinsektimi”, thuhet në njoftimin e tyre.
Komuna e Malishevës përballet me problemin e rriqrave çdo sezonë të verës. Për dallim prej disa vendeve të tjera, rriqrat në Malishevë janë helmuese.