Ish-gazetari dhe zyrtari i Ministrisë së Punëve të Jashtme dhe Diasporës (MPJD), Arben Rugova, ka vdekur sot në moshën 52-vjeçare.
Ai do të varroset në fshatin Hakaj në Plavë të Malit të Zi.
Lajmin për vdekjen e tij e bën të ditur familjarët e tij, duke treguar se ngushëllimet i pranojnë këtë të premte në shtëpinë e tij të lindjes në Hakaj, kurse në Prishtinë të dielën në Hotel Grand prej orës 9 deri në orën 17:00.
Lidhur me vdekjen e tij ka reaguar ministrja e Punëve të Jashtme dhe Diaporës, Donika Gërvalla.
Gërvalla i ka shprehur ngushëllime familjes së të ndjerit, kolegëve të punës e shokëve të tij.
Ajo është shprehur se Arben Rugova do të mbesa për ta një njëri i dashur, i respektuar dhe punëtor.
Një telegram ngushëllimi për vdekjen e tij ka ardhur nga Asociacioni i Gazetarëve të Kosovës (AGK).
“Ai ka punuar në sektorin e arsimit dhe të politikës në disa media si Koha Ditore, Gazeta Express, Telegrafi, Gazeta Lajmi e të tjera. Rugova punonte së fundi si Zyrtar për Qasje në Dokumente Publike në Ministrinë e Jashtme dhe të Diasporës”,thuhet në postimin e AGK-së.
Tutje, ish-komandanti i UÇK-së gjatë Betejës së Koshares, Rrustem Berisha, ka thënë se Rugova do të shquhet si një student i dalluar në Universitetin e Tiranës ,gazetar i shkëlqyer, një mik i mirë për shokët e kolegët dhe një kryefamiljar shembullor në familje.
Berisha ka thënë se Rugova ishte më i miri prej atyre që të bënte ta doje vendlindjen.
“Ai u shqua si një ambasador i fjalës se lirë dhe një luftetar i institucioneve të Kosovës. Vepra e Arbenit do të kujtohet për jetë e mot. Hakajt humbën sot djalin më të mirë, por edhe Kosova humbi ushtarin më të madh të së vërtetës të brezit të tij”, ka shkruar Berisha.