Aktivistja feministe dhe gazetarja e njohur amerikane, Gloria Steinem, ka vdekur në moshën 92-vjeçare, ka njoftuar fondacioni i saj.
Përmes një postimi në Instagram, fondacioni bëri të ditur se Steinem “ka ndërruar jetë paqësisht” në shtëpinë e saj në Nju Jork, e rrethuar nga njerëzit që e donin.
Steinem ishte një nga figurat më të njohura të lëvizjes për të drejtat e grave në Shtetet e Bashkuara. Ajo ishte gazetare, shkrimtare dhe redaktore, ndërsa më shumë se pesë dekada më parë bashkëthemeloi Women’s Action Alliance, një organizatë që luftonte diskriminimin dhe seksizmin ndaj grave.
Karrierën si gazetare e nisi në Nju Jork gjatë viteve 1960, ndërsa më vonë u bë një nga bashkëthemelueset e revistës Ms., e themeluar në vitin 1972. Revista u fokusua në çështjet e grave dhe u bë një prej publikimeve më të rëndësishme të lëvizjes feministe amerikane.
Gjatë viteve 1970, Steinem u bë një zë i fuqishëm në mbështetje të të drejtave riprodhuese të grave. Ajo kishte kryer vetë një abort ilegal në Londër në moshën 22-vjeçare. Vite më vonë, ajo përshëndeti vendimin e Gjykatës Supreme të SHBA-së të vitit 1973 në çështjen Roe v. Wade, e cila u dha grave të drejtën kushtetuese për abort. Steinem jetoi mjaftueshëm për të dëshmuar edhe anulimin e këtij vendimi, gati gjysmë shekulli më vonë.
Përveç të drejtave riprodhuese, Steinem ishte aktiviste për barazinë gjinore dhe pagën e barabartë për gratë. Ajo mbështeti gjithashtu legalizimin e martesave mes personave të të njëjtit seks dhe kundërshtoi dënimin me vdekje dhe gjymtimin gjenital të grave, raporton BBC.
Gloria Steinem lindi më 25 mars 1934 në Toledo të Ohajos. Fëmijërinë e pati të vështirë dhe deri në moshën 12-vjeçare nuk ndoqi rregullisht shkollën.
Pas përfundimit të universitetit në fund të viteve 1950, ajo shkoi në Indi me një bursë kërkimore. Atje punoi në role të ndryshme, përfshirë edhe me gra të fshatrave që organizonin protesta paqësore kundër politikave qeveritare. Kjo përvojë ndikoi në angazhimin e saj të mëvonshëm në aktivizmin qytetar.
Në fillim të viteve 1960, Steinem u zhvendos në Nju Jork dhe nisi të punonte si shkrimtare e pavarur. Një nga punët që e bëri të njohur ishte një investigim mbi kushtet e punës së vajzave të revistës Playboy, të njohura si “Playboy Bunnies”.
Më vonë ajo u bë kolumniste e New York Magazine, përpara se të bashkëthemelonte revistën Ms. në vitin 1972.
Fondacioni i saj tha se Steinem “vazhdoi të punonte për barazinë deri në fund”.
Me vdekjen e saj, lëvizja feministe amerikane humbi një prej figurave të saj më të rëndësishme dhe më të njohura.