Një person i gjinisë femërore ka vdekur në rrethana të dyshimta në Komunën e Drenasit, sipas Policisë së Kosovës.
Ajo është dërguar për tretman mjekësor në spital, mjeku e ka konstatuar vdekjen e saj. Sipas tij viktima ka pasur shenja të dhunës në trup.
“Viktima femër kosovare është dërguar për tretman mjekësor, mjeku ka konstatuar vdekjen e saj. Sipas mjekut, viktima ka shenja dhune në trup. Me vendim të prokurorit trupi i pajetë i viktimës është dërguar në IML për obduksion”, thuhet në raportin e Policisë së Kosovë.
Përveç këtij rasti, në raportin e policisë është raportuar edhe një vrasje në tentativë si dhe një tentim dhunimi.
Vrasja në tentativë ka ndodhur në fshatin Vërmicë të Komunës së Prizrenit, ku raportohet se janë therur me thikë dy shtetas të huaj nga disa persona të panjohur.
“Raportohet se në rrethana të panjohura dy ankuesit meshkuj shtetas të huaj janë therur me thikë nga persona të panjohur. Viktimat janë duke u trajtuar në spital. Njësia përkatëse policore është duke hetuar rastin”, thuhet raportin e policisë.
Kurse tentim dhunimi ka ndodhur në Komunën e Prishtinës, rast të cilin e ka raportuar viktima grua ndaj dy personave të gjinisë mashkullore të cilët nuk i njihte.
“Ankuesja femër kosovare ka raportuar rastin e lartcekur ndaj dy të dyshuar meshkuj të panjohur për të. E njëjta ka arritur të largohet nga të dyshuarit të cilët më pas me veturë janë larguar nga vendi i ngjarjes. Rasti vazhdon të hetohet nga njësitet kompetente policore”, thuhet në raport.