Një aksident komunikacioni është regjistruar në mëngjesin e së hënës në rrugën “Zagrebi” në Prishtinë, ku një zyrtar policor ka humbur jetën, ndërsa Policia ka bërë të ditur se vdekja e tij dyshohet të ketë ndodhur para aksidentit.
Zëdhënësi i Policisë për rajonin e Prishtinës, Enis Pllana, ka konfirmuar se rasti është raportuar rreth orës 06:30 dhe se në aksident ka qenë e përfshirë një veturë.
Sipas tij, ekipet policore dhe emergjente kanë dalë menjëherë në vendin e ngjarjes, ku mjekët kanë konstatuar vdekjen e viktimës.
Pllana ka theksuar se, bazuar në dyshimet e para, zyrtari policor ka ndërruar jetë para se të ndodhte aksidenti i komunikacionit, si pasojë e një sulmi në zemër.
“Sot rreth orës 06:30 në rrugën Zagrebi në Prishtinë, ka ndodhur një aksident trafiku, ku ka qenë e përfshirë një veturë. Njësitet policore dhe emergjenca kanë dalë menjëherë në vendin e ngjarjes, ku nga këta të fundit është konstatuar vdekja e viktimës (zyrtar policor), që dyshohet të ketë ndodhë para aksidentit. Me rastin është duke u marrë Njësia Rajonale e Trafikut, ndërsa hetimet janë në zhvillim për të sqaruar shkaqet e sakta të aksidentit”, ka njoftuar Pllana.