Producentja e njohur Vjosa Berisha prej disa muajsh po përballej me sëmundjen e kancerit.
Gjatë përballjes së saj me kancerin ajo është munduar që vazhdimisht t’u japë këshilla të tjerëve të prekur me kancer.
Më datën 23 qershor, e enjte, regjisorja ka ndërruar jetë në moshë 50-vjeçare.
Lajmin e ka bërë të ditur bashkëshorti i saj, Fatos Berisha përmes një postimi të bërë në Instagram.
“Me pikëllim të thellë bëjmë të ditur se e dashura jonë Vjosa Berisha ndërroi jetë, sot me datë 23 qershor në spitalin University College Hospital në Londër. Datën dhe vendin e varrimit do ta bëjmë të ditur më vonë.
Familjet Berisha dhe Istrefi” ka shkruar Berisha.
Berisha ka pasur mbi 20 vjet përvojë në marrëdhëniet me publikun, median dhe industrinë e filmit, ajo prodhoi dy filma artistikë. Filmi i saj i parë artistik si producente ishte – “The Flying Circus” (2019) me skenaristin dhe regjisorin Fatos Berisha si dhe filmin artistik maqedonas “The Happiness Effect” (2019) me regjisorin Borjan Zafirovski.
Ajo ishte, gjithashtu, bashkëthemeluese dhe ka menaxhuar Festivalin Ndërkombëtar të Filmit në Prishtinë – PriFest që nga fillimi, duke marrë rolin e Drejtorit të Festivalit për 11 vjet.
Gjithashtu, Vjosa ishte edhe anëtare e Akademisë Evropiane të Filmit që nga viti 2013.
