Bashkëthemeluesi i Departamentit të Psikologjisë në Universitetin e Prishtinës “Hasan Prishtina”, profesori, Moshe Landsman, ka vdekur sot në moshën 75-vjeçare.
Lajmin e ka bërë të ditur Qendra Kosovare për Rehabilitimin e Viktimave të Torturës, përmes një njoftimi.
Në këtë njoftim, profesori u cilësua si një figurë që e tejkaloi rolin e profesorit dhe të pedagogut, duke u shndërruar kështu në një figurë emblematike, i cila ka mbështetur, përkrahur dhe inkurajuar të tjerët.
“Para pak ditësh ai ishte në mesin tonë, në ambientet e QKRMT-së, i shoqëruar me qetësinë dhe thellësinë e tij. Për shumë vite, ne si QKRMT, kishim një bashkëpunim të ngushtë me Prof. Moshen”, thuhet në njoftim.
Tutje, thuhet se ai është duke lënë gjurmë të thella, jo vetëm në fushën e dijes dhe të nxënies, por edhe në shtytjen dhe inkurajimin e talenteve të reja drejt sukseseve të dëshmuara profesionale, në nivel shoqëror dhe shtetëror për Kosovën.
“Prof. Moshe ishte një model i gjallë i humanizmit, përunjësisë dhe filantropisë. Vdekja shpesh duket si e pabesë dhe shpërfaqet në befasi por në thelb është e dëlirë dhe shton dashurinë e atyre që mbesin në jetë. Ne do të vazhdojmë ta njohim kontributin e tij dhe ta kujtojmë atë me dashuri. I shprehim ngushëllime tona të thella familjes, miqve dhe bashkëpunëtorëve të tij!”, thuhet tutje në njoftim.
Vitin e kaluar, Ministria e Arsimit, Shkencës, Teknologjisë dhe Inovacionit (MAShTI) e ka vlerësuar profesorin Landsman me çmim nderi për kontributin e tij në zhvillimin e arsimit në Kosovë, me theks të veçantë në fushën e psikologjisë.