Shefi i stafit në Kabinetin e Presidencës së Kosovës, Blerim Vela, ka deklaruar se pohimi për mbështetje për grupin ushtarakë “Wagner” nga ekstremistët e krahut të djathtë në Serbi është vazhdim i pranisë të mercenarëve serb në anën e Rusisë në luftën kundër Ukrainës.
Po ashtu, ai ka thënë se marrëveshja e regjimit të presidentit të Serbisë, Aleksandër Vuçiq, me ekstremistët e krahut të djathtë synon ta destabilizojë rajonin.
“Marrëveshja e regjimit të Vuçiqit me ekstremistët e krahut të djathtë synon të destabilizojë rajonin. Shprehjet e mbështetjes për “Wagner” nga ekstremistët e krahut të djathtë në Serbi është vazhdim i pranisë gjithnjë në rritje të mercenarëve nga SRB në anën e Rusisë në luftën kundër Ukrainës”, ka shkruar Vela në rrjetin social Twitter.
Ndërkaq, Vela në Twitter ka publikuar edhe foto të grupit të kontraktorëve privatë ushtarakë “Wagner”.
Expression of support for Wagner by right-wing extremists in #Serbia is continuation of the ever increasing presence of mercenaries from SRB on #Russia’s side in the war against #Ukraine.
Vučić’s regime collusion with the right-wing extremists is aimed to destabilize the region. pic.twitter.com/3gWvvylVGD
— Blerim Vela (@Blerim_Vela) January 14, 2023
Lexo edhe: Grupi “Wagner” mund të ketë hyrë brenda Kosovës
Ndërsa, këshilltari i lartë amerikan, Derek Chollet, të premten kishte shprehur shqetësimet e tij për prezencën e grupit mercenar rus ‘Wagner’ në Ballkan, duke theksuar se duhet “të ndalet aktiviteti i tyre”.
Në një konferencë për media në Beograd, Chollet ka thënë se i ka shprehur këto shqetësime gjatë bisedimeve në Beograd të enjten me presidentin e Serbisë, Aleksandër Vuçiq.
“Kemi parë se Grupi Wagner po përpiqet të rekrutojë ushtarë nga Serbia dhe gjetiu, dhe kjo është diçka që ne mendojmë se nuk mund të vazhdojë”, ka thënë ai.
Kujtojmë se, deputeti nga radhët e Partisë Demokratike të Kosovës (PDK), Enver Hoxhaj, kishte reaguar në lidhje me situatën në Veri të Kosovës.
Përmes një postimi, Hoxhaj më 18 dhjetor 2022, kishte thënë se në kufirin ndërmjet Kosovës dhe Serbisë, “regjimi i Vuçiqit organizoi protesta dhe tensione në bashkëpunim me grupin Wagner që është i përfshirë në agresionin kundër Ukrainës”.
“Kjo lojë e pistë e Beogradit ekziston për dekada. Regjimi serb është i vetmi përgjegjës për tensionet”, kishte shtuar Hoxhaj.