Bëhet fjalë për Martin Berishajn që përfaqëson Kosovën në Kroaci, i cili dyshohet të jetë përfshirë në një skandal financiar para zgjedhjeve në Slloveni.
Kur kjo ndodhi, në vëmendje është kthyer procesi i verifikimit të diplomatëve.
Ambasador politik si ky i fundit para se të pranojnë detyrën duhet t’i nënshtrohen llupës së Agjencisë Kosovare të Inteligjencës. Janë disa pjesë që paracaktojnë kriteret në Ligjin për Klasifikimin e Informacioneve dhe Verifikimin e Sigurisë. Përpos të dhënave për përgatitjen intelektuale dhe aktivitetet politike, kërkohen edhe informacione mbi gjendjen aktuale financiare, përfshirë borxhet dhe obligimet tjera.
Për këtë çështje ka komentuar edhe ish-ambasadori i Kosovës në Shqipëri, Nait Hasani. Ai e vlerëson si të domosdoshëm procesin e verifikimit për diplomatët që përfaqësojnë Republikën e Kosovës.
“Ata duhet ta kenë një verifikim nga propozuesi, kush është, përgatitja profesionale, dinjiteti, background-i i tij politik ose shoqëror për ta mbrojtur ose përfaqësuar shtetin në shtetin pritës”, ka deklaruar për RTV Dukagjini ish-ambasadori Hasani.
Raste si ky i fundit për dyshimet mbi ambasadorin në Kroaci, sipas profesorit Përparim Gruda kanë ndikim edhe në rrugën e Kosovës drejt organizatave ndërkombëtare.
“Kjo do të ketë implikime të jashtëzakonshme për pretendimet tona për anëtarësim në organizata ndërkombëtare. Sidomos në organizatat e sigurisë siç janë INTERPOL-i dhe EUROPOL-i sepse kjo është çështje e sigurisë në rend të parë”, deklaron Gruda.
Për një shtet si Kosova, sipas Grudës është shumë e dëmshme të ketë raportime për përfshirje të ambasadorëve në veprimtari ilegale.