Metush Kryeziu, ish-luftëtar i UÇK-së ka ardhur nga Malisheva për të përcjell në selinë e Organizatës së Veteranëve, nisjen e gjykimit ndaj ish-krerëve të Ushtrisë Çlirimtare të Kosovës.
Ai tani drejton organizatën e veteranëve në Malishevë, derisa thotë proceset e tilla gjyqësore edhe më shumë se dy dekada që nga lufta, vetëm po u japin forcë.
“Nëse dënohet individi ai sot duhet të ja lexoj aktakuzën Hashim Thacit se çfarë vrasje ka bë se jo hierarkinë e tij ushtarke. Është absurditeti tjetër ku mundohet më një plumb në sy thotë populli me i vra dy lepuj ku thotë këta të LPK-së dhe të LDK-së ku dihet se 99% e ushtarëve që janë vesh kanë qenë në LDK-së por askush nuk ka luftu për parti por me shliru vendin e vet dhe kjo është një përqarje që po mundohet më ja ba kjo prokurori popullit shqiptar”, ka thënë Metush Kryeziu, kryetar i OVL-UÇK-së në Malishevë.
Ai e shumë pjesëtarë të veteranëve janë mbledhur në selinë e OVL UÇK-së në Prishtinë për të parë gjykimin nga Haga.
“Ne nuk presim shumë nga kjo Gjykatë pasi i kemi parë vendimet e kaluara që janë marrë nga ta. Këta nuk kanë fakte fare. Këto që po I thojnë ne I kemi pasur të ditura, kanë pasur njerëz të akuzar në UNMIK, EULEX e në Gjykata të tjera. Këta po akuzohen për ato që tashmë kanë kaluar si procese Gjyqësore më herët, qoftë në Hagë qoftë edhe në Gjykata të tjera e që në shumicën e rasteve janë shpallur të pafajshëm, si në rastin e Haradinajt, Limajt e grupi i LLapit”, ka thënë ushtruesi i detyrës së kryetarit të OVL-UÇK-së, Faton Klinaku.
Pas 2 vjet e 4 muajsh që kur u arrestuan, këtë të hënë në Hagë ka nisur gjykimi kryesor ndaj Hashim Thaçit, Kadri Veselit, Rexhep Selimit e Jakup Krasniqit.