Disa pamje të publikuara nga agjencia prestigjioze “Associated Press”, shfaqin grupin e sulmuesve teksa lëviznin në Manastirin e Banjskës të Zveçan të dielën.
Rreth 30 persona të maskuar shihen teksa lëvizin në manastir pak orë pasi kishin qëlluar policin Afrim Bunjaku, i cili mbet i vrarë të dielën.
Pamjet nga droni tregojnë sulmuesit teksa ecin maleve si dhe brenda mureve të manastirit.
Ndryshe, kryeministri i Kosovës, Albin Kurti, ka publikuar disa fotografi ku shihen një mori armë dhe pajisje të nivelit ushtarak e të cilat janë sekuestruar nga Policia e Kosovës pas sulmit në veri.
Në llogarinë e tij në platformën “X”, Kurti ka thënë se autorët vepruan jo vetëm, por me mbështetjen e shtetit.
Ai thotë se Serbia duhet të mbahet përgjegjëse për sponsorizimin e dhunës terroriste në territorin e Kosovës.
“Këto armë dhe pajisje të nivelit ushtarak – të sekuestruara në operacionin antiterror të Policisë së Kosovës pas sulmit të djeshëm – nuk lënë vend për dyshim: autorët vepruan jo vetëm, por me mbështetjen e shtetit. Serbia duhet të mbahet plotësisht përgjegjëse për sponsorizimin e dhunës terroriste në territorin e Kosovës”, shkroi Kurti.