Garda ceremoniale tashmë po i bënte përgatitjet e fundit në hyrje të Presidencës.
Poshtë, shtrohej me saktësi edhe tepihu i kuq nëpër të cilin do të ecë Vjosa Osmani për herë të fundit si presidente, të paktën në këtë mandat.
Kështu, u përgatitën kushtet që Osmani të takohet me kryetaren e Kuvendit, të cilës do t’ia dorëzojë detyrën, meqë presidenti i ri nuk ende nuk është zgjedhur.
Bisedën, Osmani e nisi me një dëshirë që po i plotësohet.
“Gjithmonë ka qenë dëshirë e imja që ta dorëzoj detyrën tek një grua. Dhe kjo po më plotësohet. Uroj që ta ngrehni këmbën zhag, që pas jush të jetë një grua”, ka thënë Osmani.
Haxhiun, e paralajmëroi edhe për sfidat që do t’i ketë.
“Të jesh kreu i shtetit dhe ta udhëheqësh politikën e jashtme, janë përgjegjësi e jashtëzakonshme”, ka shtuar Osmani.
Andaj, i ofroi përkrahje në vazhdim.
“Për çkado që keni nevojë, jemi veç një thirrje larg”, ka thënë Osman.
Haxhiu e mirëpriti ndihmën e ofruar, ndërsa tha se e kupton peshën e përgjegjësisë së re.
“E kuptoj Kushtetutën, i kuptoj përgjegjësitë. Dhe zotohem që do të veprojë konfrorm Kushtetutës”, ka thënë Haxhiu.
Por, në rolin unifikues për çka obligohet nga pozita e re, Haxhiu hyri shpejt.
‘u bëj thirrje grupeve parlamentare, deputetëve, që sa më parë të ketë një zgjidhje për çështjen e presidentit, le ti lënë anash dallimet politike e inatet”, ka shtuar Haxhiu.
Kështu, erdhi edhe momenti kulmor, dorëzimi i Kushtetutës.
“Është kushtetuta që ma ka dorëzuar Glauku”, ka thënë Osmani.
Pjesën më të madhe të bisedës, Osmani e Haxhiu, e bënë sidomos kur mediat dolën nga zyra e Presidencës.
Pas gati 40 minutave, bashkëpunëtorët e Osmanit me mandat pesë vjeçar u përshëndetën me ata që kanë mandat të përhershëm.
Pastaj, radha i erdhi edhe Osmanit.
Më së gjati, u ndal tek një nga bashkëpunëtoret.Pastaj, eci drejtë veturës historike të trashëguar nga Ibrahim Rugova, afër së cilës u prit me duartrokitje, nga bashkëpunëtorët e saj.