Kontributi i Gjermanisë në shtetndërtimin e Republikës së Kosovës është i madh, si në ndërtimin e kapaciteteve institucionale, ekonomike e të sigurisë. Kështu u tha në 25-vjetorin e bashkëpunimit zhvillimor ndërmjet Kosovës dhe Gjermanisë, raporton Ekonomia Online.
Në këtë ngjarje, u prezantua edhe dizajni i “Buddy Bear” – një simbol i miqësisë gjermane-kosovare.
Ministrja e Industrisë, Ndërmarrësisë dhe Tregtisë, Rozeta Hajdari, tha se Gjermania është një ndër shtetet e para që ka mbështetur Kosovën në etapa të ndryshme. Ajo falënderoi këtë shtet edhe për ruajtjen e sigurisë në Kosovë.
“Unë si ministre jam dëshmitare e bashkëpunimin tonë special me shtetin mik, Gjermaninë. Gjermania është një nga shtetet e para që e njohu Pavarësinë e Kosovës, është partneri kryesor tregtar për Kosovën. Gjermania është partneri kryesor për sigurinë e Kosovës me ekipin më të madhe të KFOR-it prë ta ruajtur sigurinë tonë. Jam dëshmitare ku në vitin 2008, pas deklaratës së Pavarësisë së Kosovës, në konferencën pas pavarësisë, Gjermania ishte një nga donatorët më të mëdha për Republikën e Kosovës, duke bërë zotime për ndihmë në shumë sfera”./EO