Raportuesja për Kosovën në Parlamentin Evropian, Viola von Cramon, në vazhdën e disa çështjeve, ka folur edhe për mungesën e liberalizimit të vizave për Kosovën.
Gjatë vizitës së saj në Kosovë, në një konferencë për media, Cramon ka thënë se nuk është në dorën e Kosovës çështja e vizave, derisa ka theksuar se kriteret për heqjen e tyre, janë plotësuar kohë më parë.
Ajo ka mohuar se çështja e vizave ka të bëjë me mungesën e rezultateve në dialogun Kosovë-Serbi, teksa ka thënë se kjo lidhet më shumë me disa vende të cilat kanë rezerva për shkak të sigurisë së tyre të brendshme.
“Nuk ka kurrfarë ndëshkimi për shkak të mungesës së rezultateve në dialog. Pavarësisht nga secila qeveri, nuk ka pasur kurrfarë rezultate për vizat. Mendoj që diskutimet në këshill janë më shumë për gjendjen në terren. Për fat të keq, kjo më bën shumë të pikëlluar, nuk është në dorën tuaj, ju i keni përmbushur të gjitha kriteret. Raporti i rishikuar i komisionit nuk ka kritikuar asgjë, asgjë nuk po mungon, kjo nuk mund të lidhet me mungesën e rezultateve në dialog. Disa vende anëtare kanë rezerva”, ka thënë Cramon.
Cramon bëri të ditur se vendimi për heqjen apo jo të vizave pritet të merret në mes të muajit nëntor apo në fillim të dhjetorit, teksa ka paralajmëruar se mund të ketë kushte të reja për Kosovën.
“Vendimi do të jetë kah mesi i nëntorit apo fillimi i dhjetorit. Por pyetja është se a do të dërgojë te një sistem kushtesh të reja, që do të ishte krejtësisht i padrejtë, apo do të shohim një datë se kur do të liberalizohen vizat, që është vendim i vonuar”, ka theksuar Cramon.
Raportuesja për Kosovën tha se përveç Francës janë edhe disa shtete të tjera që kanë rezerva sa i përket çështjes së vizave për Kosovën.