Mosmarrëveshjet disa fëmijë që i patën në rrjete sociale dolën t’i zgjidhin përballë.
Por, përleshja kaloi në dhunë fizike, e me përdorim të mjeteve të mprehta, ku si pasojë e plagëve një 57 vjeçar vdiq e një tjetër mbeti i plagosur.
Familjarët e viktimës nuk deshën të flasin para kamerës, meqë thanë se nuk kanë qenë të pranishëm kur ka ndodhur rasti, ndërkohë që thanë se motivi dyshohet të ketë qenë një mosmarrëveshje e disa të rinjve e nisur në Tik Tok e që ka vazhduar tek personat e moshës madhore.
Ata tutje thanë se me të dyshuarit nuk kishin asnjë lidhje gjaku vetëm se jetonin në të njëjtin fshat dhe se i dyshuari kryesor S.K kishte qenë problematik edhe në të kaluarën.
Në Qendrën e Mjekësisë Familjare në Magurë 57 vjeçarin e kishin dërguar familjarët por kur kishte arritur atje kishte qenë pa shenja jete.
Ndërkohë, që në vendin e ngjarjes në fshatin Zllakoqan të Lipjanit ishin të gjitha njësitet e policisë e të prokurorisë, ku edhe kanë arrestuar dy të dyshuarit.
“Rreth orës 13:00, policia ka marrë informatën për një vrasje që ka ndodhë në fshatin Zllakuqan të Lipjanit. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në informacionet e para janë ngritur dyshimet se një mosmarrëveshje mes disa personave ka rezultuar me plagosjen e rëndë të dy personave, dyshohet me mjet të mprehtë thikë. Njëri nga personat e lënduar ka vdekur, ndërsa i lënduari tjetër është dërguar për tretman mjekësor. Vdekjen e viktimës mashkull, rreth 57 vjeç, e ka konstatuar ekipi mjekësor në QKMF në Magure. Aktualisht hetuesit policor në koordinim me prokurorinë, po ndërmarrin veprimet hetimore për për ndriçimin e plotë të rastit,ndërkohë që dy persona të dyshuar janë arrestuar.”
Në lidhje me hetimet për këtë rast nuk janë përgjigjur nga Prokuroria Themelore në Prishtinë.
Një i vdekur e një i therur me thikë në Zllakuqan të Lipjanit, arrestohen dy të dyshuar