Mediet ndërkombëtare po raportojnë se Hamasi ka konfirmuar vdekjen e një prej zyrtarëve të saj të lartë, Saleh al-Arouri.
Saleh al-Arouri është vrarë në shpërthimin në periferinë jugore të Bejrutit, Dahiyeh, raportojnë AFP dhe Reuters, duke cituar burime të sigurisë.
57-vjeçari ishte nënkryetar i byrosë politike të Hamasit dhe komandanti themelues i Brigadave Al-Qassam, krahu ushtarak i grupit.
Ai ishte i përfshirë në një marrëveshje, që bëri që më shumë se një mijë të burgosur palestinezë të liroheshin në këmbim të një tetari të IDF-së në vitin 2011.
Al-Arouri ishte, gjithashtu, i lidhur ngushtë me Iranin dhe grupin e Hezbollahut në Liban – një organizatë myslimane, e cilësuar si organizatë terroriste nga shtetet perëndimore, Izraeli, vendet arabe të Gjirit dhe Liga Arabe.
Ai iu bashkua Hamasit në vitin 1987, duke udhëhequr lëvizjen studentore islame dhe duke ndihmuar në krijimin e pranisë ushtarake të grupit në Bregun Perëndimor, raporton BBC, përcjell Dukagjini.
Ai ishte vendosur në Liban para vdekjes së tij.