Presidenti i Serbisë, Aleksandar Vuçiq, ka anuluar të gjitha vizitat jashtë vendit për shkak të “situatës” në Kosovë, raporton “Tanjug” duke iu referuar njoftimit të Presidencës së Serbisë.
Vuçiq i ka kërkuar falje presidentit të Egjiptit, Abdel Fattah el-Sisi, për anulimin e pjesëmarrjes së tij në takimin COP 27, i cili mbahet në Sharm el-Sheikh duke filluar nga 7 nëntori.
Ndërkaq, i pari i Serbisë sot (e premte) do të takohet me të dërguarin special të Bashkimit Evropian për dialogun Kosovë-Serbi, Miroslav Lajçak, takim ky i cili do të fillojë në orën 18:30, raporton “Danas”.
Ndërkaq seanca e Qeverisë së Serbisë do të mbahet të shtunën e 5 nëntorit në të cilën Vuçiq do të informojë anëtarët e qeverisë për “situatën”në Kosovë, raportojnë mediat serbe.
Ndryshe, të enjten e 3 nëntorit, drejtori Rajonal i Policisë në Mitrovicë të Veriut, Nenad Gjuriq, është suspenduar nga pozita e tij për shkak se ka refuzuar ta zbatojë vendimin e Qeverisë së Kosovës për shpërndarjen e fletëve qortuese për shoferët që kanë makina me targa të lëshuara nga Serbia.
Ndërsa, mbrëmjen e dy nëntorit, në Jasonevik të Zubin Potokut është sulmuar stacioni i Policisë së Kosovës.
Nga incidenti asnjë person nuk ka mbetur i lënduar, përderisa plumbi është gjetur në rrethojën e stacionit.
Autorët janë akoma të panjohur për organet e rendit.
Sulmohet me armë zjarri stacioni i Policisë së Kosovës në Zubin Potok