Presidenti i Serbisë, Aleksandër Vuçiq, pas tensioneve të fundit në veri të Kosovës, ku u vra polici i Kosovës, Afrim Bunjaku, ka thënë se kryeministri i Kosovës, Albin Kurti, është organizatori kryesor i këtij kaosi.
Kështu tha në një konferencë për media, teksa theksoi se Serbia nuk ka kontroll efektiv në Kosovë.
“Serbët e Kosovës u rebeluan duke mos dashur ta durojnë më terrorin e Kurtit. Nuk dua ta arsyetoj vrasjen e policit shqiptar, kjo është për t’u gjykuar dhe është diçka që nuk iu desht askujt e më së paku popullit serb. Kurti është organizatori kryesor i kaosit në Kosovë. Tre serbë janë vrarë, dy me snajper nga një distancë e madhe, që nuk ka pasur nevojë të ndodhë. Një person është në pikëpyetje nëse do të mbijetojë, nuk i kanë dhënë ndihmë. E kemi incizimin ku qeshen Policia e Kosovës, thonë lëre le të vdesë. Ata shfrytëzuan snajperë dhe qëlluan edhe në shtëpi private në Banjskë. Ishin disa persona të moshuar aty”, u shpreh Vuçiq.
“Albin Kurti është fajtori i vetëm”, tha ai.
Në një adresim të drejtpërdrejtë televiziv, mbrëmjen e së dielës, ai tha se “tre serbë nga Kosova u vranë – dy nga snajperët – dy u plagosën rëndë dhe ka frikë për vrasjen edhe të personit të katërt”.
“Rreth orës 02:46 të natës së sotme, një grup serbësh nga Kosova dy kamionë si barrikada në Banjskë – në veri të Kosovës. Më pas shkoi Policia e Kosovës dhe tentoi t’i largojë ato barrikada. Kishte një konflikt me serbët që vendosën barrikada, dhe në atë konflikt mbeti i vrarë polici Afrim Bunjaku dhe një person tjetër u plagos”, tha Vuçiq.
“Serbët dhe jo njerëzit nga Serbia qendrore, siç gënjyen në mediat e Prishtinës, por nga Kosova u rebeluan, duke mos dashur të vuajnë më terrorin e [kryeministrit të Kosovës, Albin] Kurti”.
“Unë, në asnjë mënyrë, nuk dua ta justifikoj vrasjen e një polici shqiptar dhe as nuk mund ta justifikoj. Është një akt i dënueshëm dhe është diçka që nuk i duhej askujt”, tha presidenti serb.
Sipas tij, i vetmi fajtor për atë që po ndodh në veri, “është Albin Kurti”.