Presidenti i Serbisë, Aleksandër Vuçiq, ka thënë se aplikimi i Kosovës për anëtarësim në Bashkimin Evropian “shkel Marrëveshjen e Washington-it”.
Ky reagim i tij vjen pasi sot Kosova zyrtarisht aplikoi për anëtarësim në BE.
“Ne do t’u përgjigjemi të gjitha këtyre sonte, pas mbledhjes së Qeverisë. Ne po ashtu do të marrim përgjigje sa i përket kërkesës sonë lidhur me Rezolutën 1244, por edhe për tërheqjen e njohjes së Kosovës nga shumë shtete”, ka thënë Vuçiq për gazetarët më 15 dhjetor, gjatë një vizite në kufirin midis Serbisë dhe Hungarisë, shkruan N1.
Sipas tij, aplikimi i Kosovës për anëtarësim në BE “shkel nenin 49 të Traktatit të BE-së”.
“Nuk e di me çfarë kriteresh shihet nëse është shtet apo jo, a i referohet një shteti të BE-së apo të gjitha shteteve të BE-së, apo anëtarësimit në Kombet e Bashkuara”, ka vijuar ai.
Ndërkaq i pyetur për takimin e djeshëm me përfaqësuesin special të BE-së për dialogun Kosovë-Serbi, Miroslav Lajçak dhe zëvendësndihmëssekretarin amerikan të shtetit, Gabriel Escobar, ai ka thënë se “Do të shohim nëse do të dalim nga kjo situatë”.
“Situata është e komplikuar, por ne do të bëjmë çmos për të ruajtur paqen dhe stabilitetin”, tha Vuçiq duke thënë se mbetet për t’u parë nëse ia dalin apo jo.
Ndryshe, presidenti i Serbisë, Aleksandër Vuçiq, bëri të ditur se pas seancës së 15 dhjetorit, Qeveria e Serbisë do t’i dërgojë kërkesë komandantit të misionit të NATO-s në Kosovë, KFOR, për të dërguar deri në një mijë forca të sigurisë në Kosovë.