Presidenti serb, Aleksandër Vuçiq, ka thënë se është hera e parë që ka dëgjuar se dikush në Evropë, kërkon njohje reciproke në mes të Kosovës dhe Serbisë, duke ju referuar deklaratave të kancelarit gjerman Olaf Scholz, gjatë vizitës së tij në Kosovë.
“Sot dëgjuam se po kërkohet njohje reciproke, për herë të parë, këtë nuk e kemi dëgjuar nga Evropa deri më tani. Ishte një surprizë për ne, por Gjermania është e madhe, ne jemi të vegjël. Mbetet të shihet se si do ta trajtojmë këtë”, tha Vuçiq, raporton gazeta Nova.
“Askush nuk ka folur ndonjëherë për njohje reciproke, përveç amerikanëve”, tha Vuçiq.
Vuçiq, njoftoi se kancelari gjerman ishte i qartë në kërkesat e tij ndaj Serbisë, sipas presidentit serb, Scholz ka kërkuar që Serbia të bashkohet me vendet e tjera evropiane për t’i vendosur sanksione Rusisë.
“Ne folëm për situatën e përgjithshme politike në Evropë dhe në botë, dhe ai qartë, me vendosmëri dhe ashpërsi na kërkoi t’i bashkohemi sanksioneve”, tha Vuçiq.
Vuciq, tha se Serbia ka qëndrim të ndryshëm me Gjermaninë për sa i përket mundësinë e vendosjes së sanksioneve ndaj Rusisë.
“Për sa i përket sanksioneve, ne kemi një qëndrim të ndryshëm për shumë arsye. Njëra është kundërpyetja – cili është ndryshimi midis një agresioni ndaj Serbisë pa vendim të OKB-së dhe kur ai bën të njëjtën gjë me Ukrainën. I kuptova shumë mirë kërkesat e Scholz-it”, ka thënë Vuçiq.