Mesfushori i talentuar i Prishtinës, Elod Gruda, ka shënuar një moment të rëndësishëm në karrierën e tij.
Ai ka bërë debutimin me ekipin e parë të bardhekaltërve në ndeshjen ndaj Drenicës, të zhvilluar të dielën në kuadër të xhiros së fundit të Superligës së Kosovës.
Drenica triumfoi me rezultatin 1:2 në stadiumin “Fadil Vokrri”.
18-vjeçari, i cili konsiderohet një nga talentët më premtues të klubit kryeqytetas, mori mundësinë e parë në elitën e futbollit kosovar dhe la përshtypje pozitive gjatë minutave të tij në fushë.
Gruda u dallua për qetësinë me topin, saktësinë në pasime dhe lëvizjet inteligjente në mesfushë.
Ai është gjithashtu pjesë e përfaqësueseve të reja të Kosovës, ku ka qenë i angazhuar në kategoritë zinxhir të “Dardanëve”.
Debutimi ndaj Drenicës vjen si një hap i rëndësishëm për mesfushorin e ri, i cili synon të fitojë më shumë hapësira në ekipin e parë dhe të vazhdojë zhvillimin e tij në skuadrën më të trofeshme në Kosovë.