Udhëheqësi amerikan dhe ai kinez kanë paralajmëruar njëri-tjetrin për Tajvanin, gjatë një telefonate që zgjati më shumë se dy orë.
Presidenti Joe Biden i tha homologut të tij kinez, Xi Jinping, se ShBA kundërshtoi me forcë çdo lëvizje të njëanshme për të ndryshuar statusin e ishullit.
Por, ai shtoi se politika e ShBA-së për Tajvanin nuk kishte ndryshuar.
Ndërsa, Pekini ka thënë se Xi i kishte thënë Bidenit që t’i përmbahej parimit të Kinës, duke e paralajmëruar atë se “kushdo që luan me zjarrin do të digjet”.
Ky është një paralajmërim i fortë për Amerikën, por nuk është i paprecedentë. Ministria e Jashtme e Kinës përdori saktësisht të njëjtën gjuhë kur një delegacion i Kongresit të SHBA vizitoi Tajvanin në fillim të këtij viti. E njëjta frazë u përdor nga ministria e Mbrojtjes e Kinës në një paralajmërim drejtuar Tajvanit vitin e kaluar.
Tensionet mbi këtë çështje janë rritur përpara një plani të përfolur për vizitën e Kryetares së Dhomës së Përfaqësuesve të SHBA Nancy Pelosi në Tajvan.
Pelosi, e cila është e radhës për presidencën pas zëvendëspresidentit, do të ishte politikania më e lartë amerikane që do të udhëtonte në Tajvan që nga viti 1997.
Por kjo nuk do të thotë se Kina po përgatit një veprim ushtarak kundër Tajvanit, nëse – për shembull – Nancy Pelosi udhëton për në Tajvan javën e ardhshme. Në vend të kësaj, ajo i thotë Amerikës se nëse ajo vazhdon rrugën e tanishme, përfundimisht do të çojë në konflikt.
Gjithashtu, gjatë bisedës telefonike të së enjtes, Biden dhe Xi diskutuan gjithashtu për një takim të mundshëm ballë për ballë, ka thënë një zyrtar i lartë i administratës Biden, njofton BBC.
Kina e sheh Tajvanin si një provincë të shkëputur që duhet të bëhet pjesë e vendit – dhe nuk e ka përjashtuar përdorimin e mundshëm të forcës për ta arritur këtë.
Kina paralajmëron ShBA-të për vizitën e Nancy Pelosi-it në Tajvan