Presidenti ukrainas, Volodymyr Zelensky, tha se dokumentet që synojnë t’i japin fund luftës në Ukrainë janë “pothuajse gati” pas takimit të tij të sotëm me presidentin amerikan, Donald Trump.
Zelensky shtoi se Ukraina po punon me “ndershmëri dhe vendosmëri” dhe se Rusia duhet të jetë gati për të “mbyllur këtë agresion”.
Ai kujtoi se takimet e mëparshme me SHBA kanë rezultuar në sigurimin e raketave mbrojtëse për Ukrainën dhe se zyrtarët kanë diskutuar gjithashtu për mbrojtjen e hapësirës ajrore.
Presidenti ukrainas shprehu shpresën që SHBA-të do të vazhdojnë të qëndrojnë pranë Ukrainës dhe kërkoi një Evropë të fortë, duke theksuar se kontinenti ka nevojë për një Ukrainë të pavarur që një ditë mund të ndihmojë edhe në mbrojtjen e të tjerëve.
“Jemi të gatshëm të jemi pjesë e një Europe që ka vërtet rëndësi,” tha ai, duke shtuar se Trump “nuk do të ndryshojë”.
Ai kritikoi disa liderë evropianë, duke thënë se “disa janë nga Europa, por jo për Evropën” dhe se, megjithë forcën e tyre, ata “pothuajse gjithmonë kanë nevojë që dikush tjetër t’u thotë sa gjatë duhet të qëndrojnë të fortë”.
“Kështu nuk veprojnë fuqitë e mëdha,” shtoi Zelensky, raporton BBC.
Ai gjithashtu paralajmëroi se SHBA po ndryshon pozicionin e saj, por mënyra saktësisht se si nuk dihet ende.
“Gjërat lëvizin më shpejt, si mund ta ndjekë Evropa këtë ritëm?” pyeti ai, duke shtuar se Evropa përballet me sfida ndaj “mënyrës së jetesës evropiane”.