Presidenti i Ukrainës, Volodymyr Zelensky, do të jetë për një vizitë zyrtare në Turqi, ku do të takohet me presidentin turk, Rexhep Tajip Erdogan këtë të premte, më 8 mars.
Gjatë takimit pritet të diskutohet për luftën e vazhdueshme me Rusinë dhe çështjet që kanë të bëjnë me lundrimin e sigurt për anijet civile të mallrave në Detin e Zi, sipas një njoftimi nga Presidenca turke.
Siç thuhet në njoftimin e Presidencës, takimi do të zhvillohet në Pallatin Dolmabahçe, ndërsa një konferencë për shtyp është planifikuar për në orën 19:00 me orën lokale.
Siç ka njoftuar presidenca turke të enjten, fokusi i diskutimit do të jetë në luftën e Rusisë kundër Ukrainës, duke përfshirë përpjekjet për të krijuar një korridor të sigurt në Detin e Zi.
Vizita e fundit e Zelensky në Turqi ishte në korrik 2023, gjatë së cilës ai zhvilloi diskutime të gjera me Erdoganin.
Pas kthimit të tij në Kiev nga vizita e mëparshme, Zelensky solli pesë komandantë të lartë nga regjimenti Azov, të cilët ishin pjesë e një marrëveshjeje të shkëmbimit të të burgosurve me Moskën.