Kryetari i Sindikatës së Policisë, Imer Zeqiri, ka njoftuar se polici i plagosur sot nga operacioni policor për kapjen e grabitësve të Suharekës është jashtë rrezikut për jetë.
Zeqiri në “Five” tha se zyrtarët policorë të Kosovës përballen me rreziqe të mëdha në vendin e punës.
“Është jashtë rrezikut për jetë… informacionet i kam nga kolegët e mediat. Të gjithë policët me autorizime policore janë në detyrë 24 orë, kanë obligim të intervenojnë në çdo rast edhe nëse nuk janë në orar. Rrezikshmëria është më e larta, krahasuar me institucionet tjera apo me sektorët e tjerë. Nuk mund ta përjashtojmë asnjë zyrtarë policorë nga rrezikshmëria, sepse ka obligim ligjor të veprojë në çdo rast, pa marrë parasysh rastin”, tha ai.
Zeqiri theksoi se që nga formimi i Policisë së Kosovës, 23 zyrtarë policorë e kanë humbur jetën, kurse rreth 4 mijë e 700 të tjerë janë lënduar në vendin e punës.
Disa, sipas tij, kanë mbetur me invaliditet të përhershëm.
“Në realitet, kjo është e njohur në gjithë botën se Policia gjatë veprimeve policore rrezikohen, prandaj nëse flasim për shtesat e rrezikshmërisë, ose u takon policëve, ose s’di kush e meriton më shumë. Kemi 23 zyrtarë policorë që e kanë humbur jetën, kemi 4700 raste të lëndimeve dhe disa kanë mbetur me invaliditet të përhershëm. Policia sfidohet për cdo ditë me rreziqe, mbi 90% janë rreziqe të larta”, tha ai.
Policia konfirmon vrasjen e të dyshuarit për grabitjen në Suharekë, arrestohen edhe 4 të tjerë