Për zhvillimet e fundit në veri ka reaguar dhe kryediplomati italian, Antonio Tajani, ku është shprehur se tensionet në rritje mes Serbisë dhe Kosovës janë shqetësuese.
Përmes një postimi në Twitter, kryediplomati italian ka thënë se i ka kërkuar ambasadorëve në Beograd dhe Prishtinë që të bëjnë thirrje për moderim dhe dialog për të arritur një kompromis të drejtë.
Tutje, Antonio Tajani ka shtuar se Italia është e përkushtuar ndaj stabilitetit dhe sigurisë në Ballkanin Perëndimor.
“Tensionet në rritje mes Serbisë dhe Kosovës janë shqetësuese. I kërkova ambasadorëve tanë në Beograd dhe Prishtinë që të bëjnë thirrje për moderim dhe dialog për të arritur një kompromis të drejtë. Italia është e përkushtuar ndaj stabilitetit dhe sigurisë në Ballkanin Perëndimor”, ka shkruar kryediplomati italian, Antonio Tajani në Twitter.
Për zhvillimet në veri të vendit ka reaguar dhe zëvendëssekretari gjeneral i NATO-s, Mircea Geoana, i cili ka bërë të ditur se ka biseduar me emisarin e Bashkimit Evropian, Miroslav Lajçak pas zhvillimeve të fundit në veri të Kosovës, aty ku serbët vendosën që të bojkotojnë institucionet e vendit.
Përmes një reagimi në Twitter, Geoana u ka kërkuar Kosovës dhe Serbisë që këto të fundit të përmbahen dhe të parandalojnë eskalimin e situatës dhe jo vetëm.
Krahas kësaj, ai ka bërë të ditur se KFOR-i është në gjendje gatishmërie dhe i njëjti, do të ndërhyjë në rast të përshkallëzimit të situatës.