Një zjarr ka shpërthyer të shtunën në burgun famëkeq “Evin” të Iranit, burg i cili është i njohur për strehimin e të burgosurve politikë, gazetarëve dhe shtetasve të huaj.
Videot e shpërndara në internet kanë treguar flakë dhe tym në një vend në Teheran, nga i cili, dëgjoheshin të shtëna armësh dhe njëherit, shpërthime dhe jo vetëm. Njerëzit dëgjoheshin jashtë burgut, duke brohoritur “vdekje diktatorit” – një nga sloganet kryesore të lëvizjes protestuese antiqeveritare.
Një zyrtar i cituar nga media shtetërore tha se situata ishte nën kontroll, por pamjet nga video-ja tregonin ende që zjarri vazhdonte.
Tash e disa javë, Irani është përfshirë nga protestat antiqeveritare që para një muaji, me vdekjen e Mahsa Amini, në paraburgim nga policia. Ndonëse zyrtarët thanë se ajo vdiq nga një atak në zemër, familja e saj e kundërshtoi këtë, duke thënë se ajo ishte rrahur nga policia e moralit, trasmeton BBC.
Megjithatë, Rana Rahimpour nga BBC “Persian”, ka thënë se ende nuk dihet nëse situata në burg është e lidhur me demonstratat e fundit, por sipas saj, një gjë e tilllë mund të ndodhë lehtësisht, duke qenë se qindra protestues janë dërguar në “Evin”.
Duke folur brenda burgut, guvernatori i Teheranit i tha televizionit shtetëror se kishte një trazirë në një krah të burgut, i cili strehonte kriminelë të vegjël, dhe situata tani ishte plotësisht e qetë.
a lot of innocent people (political prisoners) held in iran’s evin prison. now on fire, with gunshots heard. pic.twitter.com/5Gpslox0I3
— ian bremmer (@ianbremmer) October 15, 2022
Pamjet dramatike të zjarrit dhe tymit u postuan për herë të parë në rrjetet sociale, mbrëmjen e së shtunës.
Turma të mëdha u mblodhën jashtë burgut, trafiku u ndal dhe policia e trazirave u pa duke hyrë në objekt.
Burgu është kritikuar prej kohësh nga grupet perëndimore të të drejtave. “Human Rights Watch” ka akuzuar autoritetet në burg për përdorimin e kërcënimeve me torturë dhe burgim të pacaktuar, si dhe marrjen në pyetje të gjata dhe mohimin e kujdesit mjekësor për të burgosurit.