Zëvendësministrja e Punëve të Jashtme dhe Diasporës, Liza Gashi, ka thënë se ky 25-vjetor na rikujton ndërhyrjen e NATO-s në Kosovë, duke bërë që vendi të çlirohet nga regjimi serb, duke hapur kështu rrugën drejt paqes, stabilitetit dhe demokracisë.
“Republika e Kosovës, si shteti më demokratik në rajon, ka dëshmuar mirënjohjen që ka ndaj aleancës më të madhe ushtarake, NATO, dhe miqve e partnerëve tanë, të cilët kontribuuan që vendi ynë të gëzojë paqen dhe lirinë”, ka thënë zëvendësministrja Gashi në konferencën e organizuar nga Universiteti i Prishtinës, në bashkëpunim me Universitetin e Arkanzasit, me rastin e shënimit të 25- vjetorit të ndërhyrjes së NATO-s në Kosovë.
Ajo ka thënë se si shtet dhe shoqëri jemi të përcaktuar nga vlerat e parimet demokratike dhe këtë e dëshmon pozicionimi ynë përkrah demokracive perëndimore.
Gashi ka shtuar se anëtarësimi i Kosovës në NATO është rruga më e sigurt për të ofruar siguri, paqe të qëndrueshme dhe stabilitet në rajon, duke pasur parasysh qasjen destruktive dhe veprimet e vazhdueshme destabilizuese të Serbisë.
“Historia e shtetndërtimit tonë dhe NATO-ja janë pjesë e padiskutueshme e rrëfimit të suksesshëm, si histori të pandashme nga njëra-tjetra, siç ishin dhe do të mbeten miqtë tanë ndërkombëtarë dhe përkrahja e tyre në rrugëtimin tonë drejt avancimit të progresit në vend”, ka përfunduar zv.ministrja e Punëve të Jashtme dhe Diasporës, ka njoftuar MPJD.
Në këtë konferencë kanë marrë pjesë presidentja e Kosovës, Vjosa Osmani, ambasadori amerikan, Jeff Hovenier dhe përfaqësues të tjerë nga bota e akademisë dhe shoqërisë civile.