Lidhja Demokratike e Kosovës (LDK) e ka kritikuar Qeverinë e Kosovës, në lidhje me menaxhimin e sektorit të energjisë elektrike.
Në një reagim të kësaj partie, thuhet se “një milion euro djegën çdo ditë duke mos riparuar bllokun A5”.
Sipas tyre, Blloku A5 i Termocentralit Kosova A prodhon mjaftueshëm energji elektrike për të mbuluar rreth 13% të nevojave për Kosovën, teksa shtojnë se “Ky bllok është lënë jashtë funksioni që 9 muaj me radhë”.
“Për çdo ditë që kemi blerë energji elektrike për të mbushur zbrazëtirën që do të mund ta mbulonte blloku A5, Kosova ka paguar rreth 1 milion euro import ditor”, thuhet në njoftim.
Sipas LDK-së, “nëse nuk do të ishte zvarritur remonti i këtij blloku nga pushteti, nuk do të kishte ngritje të çmimit të rrymës prej 15%”.